Կեռասենի - Cerasus avium L.,

Հայտնի է նաև հավակեռասի, վայրի բալենի անուններով։

Վարդազգիների ընտանիքին պատկանող խոշոր ծառատեսակ է, որի պտուղներն ունեն մի շարք օգտակար հատկություններ` պարունակում են 11,5% շաքարներ, 1,33% օրգանական թթուներ, կարոտին, ասկորբինաթթու, P, PP վիտամիններ, երկաթ և այլն:

Սննդում օգտագործում են թարմ հատապտուղները, որոնցից պատրաստում են կոմպոտ, մուրաբա, ջեմ, հյութ, լիկյոր: 

Կեռասը հատկապես օգտակար է երեխաներին, ուստի լայնորեն կիրառվում է մանկական սննդում` հյութերի, կոմպոտների և խյուսերի ձևով:

Երկարատև պահպանման նպատակով պտուղները սառեցնում են կամ չորացնում, իսկ թարմ վիճակում կարելի է օգտագործել 10-12 օր` պահելով սառնարանում: 

Բուժման նպատակով օգտագործվում են հասուն և չոր պտուղները, որոնցում պարունակվող բջջանյութի առկայության շնորհիվ կարգավորվում է մարսողությունը` հատկապես փորկապության և աղիքների թույլ կծկողականության դեպքում: Օգտագործվում է նաև թարմ հատապտուղներից ստացված հյութը, որը միաժամանակ օրգանիզմի տոնուսը բարձրացնող հատկություն ունի, օգտակար է ռևմատիզմի և փորլուծության ժամանակ: 

Մեծ քանակությամբ երկաթի և վիտամինների պարունակության շնորհիվ թարմ պտուղներն առավել օգտակար են սակավարյունության դեպքում:

Կեռասենու պտուղները ստամոքսի և 12-մատնյա աղիքի խոցային հիվանդության և ստամոքսահյութի բարձր թթվայնության ժամանակ այրոցի զգացում բոլորովին չեն առաջացնում, քանի որ քիչ քանակությամբ են օրգանական թթուներ պարունակում:

Ավանդական բժշկության մեջ թարմ պտուղները կիրառվում են մրսածության դեպքում, իսկ երիկամների, սրտի հիվանդությունների ժամանակ խորհուրդ է տրվում չոր պտուղներից պատրաստված եփուկը, որն ունի նաև ախորժաբեր և օրգանիզմի ընդհանուր դիմադրողականությունը բարձրացնող հատկություն:

Եփուկի պատրաստումը. 5 ճաշի գդալ (70-80 գրամ) չոր պտուղներին ավելացրեք 4 բաժակ եռացրած ջուր: 4 ժամ թրմելուց և քամելուց հետո խմեք օրը 3-4 անգամ` մեկական բաժակ, ուտելուց առաջ:

Հարցեր, պատասխաններ, մեկնաբանություններ